البوست ده إتأخر شوية بس عشان يتكتب صح ..
ناس كتير سألوني عن مصادر نقرأ منها سواء في جزء أول دكتوراة او تاني أو حتي ماجستير ..
الحقيقة من اول الحاجات اللي بتخطر في بالي هو موقع عبارة عن كنز معرفي لأحد اساتذتنا في قسم النسا والتوليد بطب عين شمس ..
أ.د. عمرو عصام Amr Essam
لظروف خارجة عن إرادته لم يكمل مسيرة التدريس اللي واضح جدا ان ربنا حباه هذة النعمة والموهبة في تبسيط وإيصال المعلومة كاملة بكل أمانة وإخلاص .. فقدر بموهبة وذكاء وعلم جم انه يستغل الإنترنت والتواصل الاجتماعي لإيصال علمه لشريحة كبيرة جدا من الأطباء اللي فعلا بحاجة ماسة إليه في ظل ضغط الشغل وضيق الوقت وارتفاع أسعار الكورسات والمؤتمرات ..
👈🏻الموقع فيه كل ما يخص النسا والتوليد من الإبرة للصاروخ بشكل مرتب متعوب فيه جامد وإشتراكه رمزي .. وفيه محاضرات كتير مجانية بمجرد التسجيل في الموقع قبل دفع الاشتراك ..
نصيحة خدوا لفة في الموقع .. محاضرات سونار وحقن مجهري وعمليات وجاليري كبير جداً وثري جداً ..
تجربتي الشخصية:
الحقيقة نظرا لظروف صحية واسرية ملخبطة قبل الامتحان وقتي كان ضيق جدا وفي مواضيع كتير قرتها من مصادر كبيرة وكنت محتاجة ألمها بشكل ملخص قبل الامتحان عشان اعرف اكتبها .. مواضيع تانية صغيرة لم يسعفني الوقت اقرأ آخر Guidelines فيها .. فالموقع بالنسبة ليا كان منقذ .. صوت د. عمرو عصام وطريقته في الشرح تثبت المعلومة بسهولة غير إنه بيشرح المعلومة in depth ..
ومن آخر Guideline نزل .. ودائما بيحدث المحاضرات لو في جديد ..
👈🏻ميزة المحاضرات إنها من غير ما تدرى بتنقلك من مستوي طالب البكالوريوس للماجستير للدكتوراة بسلاسلة وسهولة ولا أروع ..
كل محاضرة معاها pdf بتاعها تقدر تستخدمه زي ماهو مع بعض الزيادات البسيطة لو أنت طالب ماجستير او يبقي نواة لملخصك الخاص لو أنت طالب دكتوراة ..
👈🏻الموقع إضافة جميلة متكاملة لمجهودات أساتذتنا لإيصال العلم المبني علي الدليل لصغار الأطباء زي ما بيسعي القسم جاهدا يعمل محاضرات وسمسترات بآخر وأهم المواضيع ..
الموقع بقي فيه ميزة إضافيه كمان انه بيقدر يوصل لشريحة اكبر وأبعد من الأطباء .. وفخورة انه لأحد أساتذتنا ..
مش هتحس بأهمية المجهودات دي غير لما تعرف الناس بره الجامعة والمستشفيات التعليمية بيشتغلوا إزاي إلا ما رحم ربي ..
بارك الله في علمك وعملك ونفع الله بك .. بالتوفيق دائماً